Sonntag, 16. Juni 2013

Wieder mal e Blog

Es isch scho vei es Momäntli här, syt mim letschte Blog, gsehni grad. Wiu i itz ja e nöii Homepage gmacht ha, www.grippelen.ch , wetti o ume chly meh "blogge". Aber eifach so nach Luscht u Luune u ohni irgend e Zwang.  Denn machts nämlecht Spass - weme muess nid!

Auso i chume bestimmt mit nöie Informatione, demnächscht hie uf mim Blog verby.

Ir Zwüschezyt wünsche nech e guete Start i die warme bis heisse Summertage.....

liebe Gruess Matthias

Sonntag, 6. März 2011

Früehligschraft


Früehligschraft
's erstuunt doch immer wieder nöi, mit was dr Früehlig üs beschänkt.
Das mir üs drann erfröie chöi,zeigt dass e höchri Macht das Wärde länkt.
Ringsum gsesch's Trybe, gsesches Blüeje, Sunnestrahle wärme Mönsch u Tier,
Ghörsch i de Böime d' Vögel liede, dr Früehlig chlopfet a di Tür!

U uf em Fäud faht d'Arbeit a, dass me de später o eis ärnte cha.
Mit Blueme schmückt me jitze ds Hus, so farbig lüchtet's, dass chasch Fröid drann ha.
Die Früehligsstimmig tuet eim sterche, laht vergässe was eim Sorge macht.
U drum bis dankbar für das Aues, wo dir d' Natur zum Gschänk het gmacht.

Us däm chöi mir o Lehre zieh, us i-nis säuber eis la Früehlig sy.
Denn d' Früehligschraft isch Medizin wo hiuft, dass dunkli Schatte wyterzieh.
Drum bis jitzt fröhlich, gniess die Stunde, wo d' im Chreis vo dine Fründe bisch.
Tue geng chly singe, geng chly jutze, fröi di dass wieder Früehlig isch!


Das  sy Wort us mim nöischte Gedicht  "Früehligschraft". Dr Früehlig isch ja immer ganz e spezielli Zyt u es passiert o enorm viu. Die Faszination vom immer wiederkehrende Wärde, het mi de o inspieriert es nöis Jodellied für Chor z'schrybe. Das trotzdäm, o we der Früehlig scho mehrmaus i Lieder besunge wird. Es treit dr Titu:
  
"Früehligschraft"

Löh mer's auso o i üs inne jitz la Früehlig wärde u tanke Chraft für ds ganze Jahr!
 



Montag, 13. Dezember 2010

E schöni Wiehnachtszyt.




Gly scho isch sy ume da, di stiui, schöni Wiehnachtszyt
u ‚s isch bau chly verruckt wie die Zyt nume so verflügt.
Villecht isch es aber o guet u rächt e so,
wiu me süsch emänd nid vom Fläck täti cho.

Es git aube doch e huufe z’mache so am Ändi vome Jahr
u es bringt eim o fasch e chly i Stress, das isch wahr.
Aber Vieles – so meinti  – müesst ja eigentlech o nid sy
tät mes z’Jahr us chly mache u nid bis zum Schluss la sy.

Aber äbe, e isch gar nid so eifach u i has o scho usprobiert,
bis me sech gly eis ume im aute Trapp verliert.
Ersch we öppis gröbers chunnt oder ou passiert,
de bisch uf zmau vo däm komisch handle schnäu kuriert.

Es brüchti ja eigentlech gar nid viu – wurd mes merke,
wie Fründschafte, liebi Wort, lache u luschtig sy, eim chönne sterke.
Me mues sich äuä haut geng wieder vo neuem druf bsinne,
das me nume bim mitmache u drby sy, cha a Erfahrig gwinne.

Drum wünsche ig öich aune jitz vo Härze für die kommendi Zyt,
das nech gnue Luft zum mache vom einte oder andere blybt.
Ds Materielle das glänzt, strahlet u lüchtet für e Momänt,
jedes Erläbnis mit Fründe, isch es Gschänk wo ds ganz Läbe längt.


I wünsche aune e schöni u erläbnisrychi Wiehnachtszyt!

Dienstag, 9. November 2010

Vo au dr Gattig Vögu.............

Letschte Samschtig hani mer ume einisch e Usflug gönnt. I ha scho lang einisch dä nöi Riesevogu vo dr Singapore Airlines wöue ga fötele. Wiu dä itz ja regumässig au Tag uf Züri flügt, hani mer gseit so - itz ischs sowyt. Gemäss em Flugplan sött är 07.25h lande.
So hani mi de parat gmacht am sibni am Morge am Zuun in Rümlang u ha afa chly probiert mit dene Maschine wo da so nah-dis-nah ytrudlet sy. Wos du haubi achtig isch gsy u geng no ke A380 im Aaflug hani mau uf mim Iphone gugget was de im Flugplan steit. Erwartet 13:16h - momou hani dänkt - das längt ömu de sauft no für nes Gaffi!!! :-). I hami nid la beunruehige u bi du haut uf Bülach übere zum angere Bsuecherplatz. Dert hani mi wunderbar chönne vertörle... Es isch luschtig was me da so aus für Vögu gseht ume flüge. Zum Byschpiu dä JUMBOLINO vor SWISS, wones ganzes Alpufzugsmotiv druffe het.




Oder de hets da no sone luschtig bemaute Airbus gha. Eine vo de grosse, nämelecht e A340. Has zerscht gar nid realisiert u drum hani ne nid grad opimau verwütscht. Aber me gseht ömu veichly öppis vor Bemalig.

 


So gäg de haube eine isch när veichly öppis los gsy uf däm Bsuecherparkplatz. I hami o langsam ufe Wäg uf ds Fäud use gmacht, dass i de Riesevogu o schön cha abfötele. I ha nid schlächt gstuunet. Ufzmau sy da rund 20 Fotografe um mi umegstange mit umghänkte Fotoapparät. Jede het bau ds grössere Zoom druffe gha. Ha gwüss bau chly müesse lache für mi, bini mer doch bau vorcho wine Paparazzo. Ja u när isch är du cho, dä prominänt Gascht woni scho sehnlechscht druf gwartet ha.


Es isch unbeschryblech wener da so näb einem düre säglet..... I bi töif beydruckt gsy. Ja - itz hani mer du es Zmittag gönnt u bi när ume uf Rümlang übere gfahre, wiu i ne ja de no ha wöue gseh starte.

Zwüschezytlech het mer aber dr chlynscht Vogu ufem Flughafe no chly Gseuschaft gleischtet.


Woni du ume ds Rümlang bim Zuun gstange bi, hani no es paar Lüt troffe u mit dene ganz interessanti Gspräch chönne füehre. Da isch zum Byschpiu e Maa us dr SR Technics gsy, womer sehr viu so über Flüger u Wartig het chönne verzeue. Wahnsinnig spannend gsy ihm so zuezlose. So gäg de dreie am Namitag hei sy ds Fingerdock glöst u dr A380 wieder i Startposition grollt. Miteme Schlepper wome äxtra für dä A380 het gmacht - so het mer dä Maa vor SR Technics erklärt. Ja u när ischer zwäg gsy am Ändi im Norde vor Pischte 34. Isch no spezieu gsy zum lose, wo d'Triebwärk auf vou Schub sy glüffe - es isch gar nid so leid gsy. Aagnähmer zum Lose aus wene Boeing startet! Ja u de het är äbe de ume abghobe in Richtig Singapore. I bi irgendwie ganz grüehrt gsy u ha g'ougewasseret. Es isch übrigens no spezieu gsy. Genau i däm Flüger isch mi Chef gsässe wiu är gschäftlech uf Malaysia het müesse.



E wunderschöne Samschtig isch für mi langsam z'Änd gange. Mit viu schöne Ydrück bini de ume hei Richtig Ämmitau trötschgelet. Im Chopf hani no lang di Biuder vo au dene verschidnige Flugzüg gha u bi innerlech zfriede gsy, das i dä A380 einisch live ha dörfe gseh. I bi wieder einisch dusse ufem Flughafe... ganz bestimmt!

Sonntag, 18. Juli 2010

Das Licht im Walde....

Bim hütige Spaziergang ufem Äebersoud isch es mer ume eis ufgfaue. Weme da so dürne chüele u eher chly fyschter würkende Waud louft, gits immer wider da oder dert, so Liechtplätzli. Es isch interessant u spannend zum luege wie sech die chlyne Pflänzli - wo umgäh sy vo grosse bis sehr grosse Loubböim oder Tanne - sech nar Sunne strecke u im Sunnestrahl gänzlech ufblüeje. Mängisch ischs e grosse Liechtblätz, mängisch wird nume es einzigs Blüemli oder Pflänzli aagsunnet..... Es isch jedesmau schön zum luege we z'mittz usem Waud so chreftigi Farbe lüüchte.

Mi chas im positive Sinn fasch e chly uf eim übertrage. Wo Schatte isch, isch o Sunne u wos fyschter isch, gits o Liecht.....Wichtig isch eifach, das mes gseht oder o wott gseh! Es isch für mi hüt uf jedefau erfüend gsy u es het sehr guet ta, das chönne z'gschoue. Drum hani versuecht dä Momänt i Form vomene Föteli fescht z'haute.

Fröie mer üs a dene vile sunnige Momänte i üsem Läbe............

Sonntag, 23. Mai 2010

Pfingscht-Fahrt



Es isch dr erscht Blog im 2010 woni jtze da schrybe. I bi hüt mau wieder uf ne Usflug gange u drby bim wunderschöne Würzbrunnechiuchli verby cho. Hüt isch Predigt gsy i däm chlyne härzige Chiuchli u vo aune Syte här si Lüüt z'schtröme cho. Sogar no ir Tracht het me Lüt gseh. Es isch grad chly aus sig me ire "Heile Wäut" aacho, weme dert bim Chiuchli steit.

I ha no es Gedicht gfunge wo heisst "Bim Würzbrunnechiuchli"

Höch ob mim liebe Heimattal steit hinger alte Bäume, 
es Chilchli scho viel hundert Jahr u tuet dert friedlich träume.
Dert hi ziehts mi mit aller Macht, i ha nit Rueh, kei Tag, kei Nacht, 
bis ig sys Glöggli ghöre schlah wo seit: "Grüess Gott bisch ume da!"

I trappe düre Friedhof y, woni eis möcht begrabe sy, 
muess mänge früsche Grabschtei gseh wo redt zu mir vo Leid u weh. 
Doch schlafet wohl ihr Liebe all, bim Chilchli ob mim Heimattal,
i frage ds Silberglöggli bang : "Wenn lütisch mir zum letschte Gang?"

Wo's ume Chilcheegge chert dert müehjt es mi ganz bsungers hert,
es Grab voll Blueme rot u wyss, mir ischs i ghör e Stimm ganz lys:
"Mi liebe Fründ, ach truur nid so, bald wirsch ja du o zuemer cho,
los doch , was ds Silberglöggli schlaht, dy Zyt isch um, mach di parat"

Das Gedicht het dr Ruedi Rüegsegger im Aadänke a sy auzufrüeh verstorbnig Fründ Emil Bösch gschrybe u der Emil Herzog het es Jodellied drus gmacht. Ja es isch würklech ydrücklech dert die Gägend um ds Würzbrunnechiuchli u es isch gar heimelig gsy z'lose wo d'Glöggli hei d'Predigt afa ylüte. U o dä schön Ygangsboge wome vo de "Ueli dr Chnächt" oder "Ueli drPächter" Fiume kennt isch o geng no da. Woni drunger düre gange bi, isch mer grad "d Glungge-Büüri" i Sinn cho. Si isch ja o bi däm Torboge gstange u het ufe Götti gwartet u het drby ds Toufichindli het ufem Arm gha. Wo du dr Pfarrer isch cho u gseit het jtz müsse mer aafa, het si bauget, was afa settigs sig u werum dä Götti (dr Haguhans) nid zur Toufi chunnt.......  

Ja es isch schön gsy hüt dert bi däm Chiuchli chly zverwyle u de Gedanke chly freie Louf z'lah. I bi du när no chly übere Fäudwäg usgspatziert u hami vo au däm Schöne la ynäh..........

Samstag, 26. Dezember 2009

Traumland.......

Weisst du noch als ich klein war, ....... so faht das wunderschöne Lied a, wo vom Heintje super interpretiert wird. I ha dä Fium - wo das drinne vorchunnt - scho es paarmau gseh u i luegene immer gärn wieder. Die Szene, wo dr Heintje am Schribtisch im Chäuer unger das Liedli singt, geit mer jedesmau unger d'Hut. Sowieso isch das, wo dr Heintje i sine Jugendjahr gleischtet het, i mine Ouge bis hüt unerreicht!

I ha das Liedli zuefäuig bim Surfe wiederentdeckt u bi sehr froh da drüber. Aber loset doch säuber einisch ine u biudet nech öies eigete Urteil....

Unger däm Link findet dir es Video

http://www.youtube.com/watch?v=zoKu8EOKqM8

I wünsche nech viue Vergnüege